Stúdzjeopbou fan de kursus Klasse Frysk
De basis fan de kursus bestiet út 8 WOWshops (workshops mei in WOW-effekt). De dosinten nimme dy mei yn de wûndere wrâld fan taal. Sels boust oan in portfolio mei lessen op maat dy’tst gelyk tapasse kinst yn dyn eigen lessen en geskikt is foar dy en dyn skoalle.
De kursus bestiet út de ûndersteande WOWshops:
Wat is dyn taal fan it hert en wat betsjut dy taal foar dy? Biedsto ek romte oan de taal fan it hert fan bern yn dyn klasse? Wat bart der mei bern ast oandacht joust oan harren thústaal? Stek it fjoer oan mei taalbewustwurding en taalsosjology.
‘Nu begrijp ik pas écht waarom het Fries zo belangrijk is…’ sei in kursist oan ’e ein fan dizze workshop. ‘Elke ynwenner fan Nederlân soe dit ûngelooflike ferhaal oer it Frysk en Fryslân hearre moatte.’ sei in oar. Buckle up en set dy skrap foar de skiednisrollercoaster!
Stel dy foar, in romte fol mei de leukste, moaiste en grappichste berne- en jeugdboeken. Fan doe én no. Yn in trip down memory lane wurde jim ynspirearre mei de wrâld oan wurkfoarmen om dy álderleukste boeken yn ’e klasse te brûken.
Alde stoffige learboekjes foar it Frysk bestean allang net mear. De spiksplinternije digitale metoaden projekten en wurkfoarmen slute hiel goed oan by it nije ûnderwiis. Sterker noch, it Frysk rint yn in soad gefallen foarop. Wat is der mooglik en hoe kinst it tapasse? Fyn út hoesto dyn lessen it bêste stal jaan kinst, mei of sûnder metoade!
Ik praat geen Fries’, ‘Ik kin echt gjin Frysk skriuwe hear’… It sil jilde foar in soad masters, juffen en dosinten. Mar wat is der eins nedich om in ÉCHTE (TAAL)DOSINT te wêzen? De trije doeldomeinen fan Biesta en it profesjoneel selsferstean fan Kelchtermans litte dy neitinke oer fundamintele fragen yn dyn berop.
Fan Gysbert Japicx oant De Hûnekop. Lieten en gedichten kinne dy reitsje yn it djipste fan dyn siel. It Frysk hat in rike histoarje oan prachtige lieten, proaza en poëzij dêr’t de measte Friezen hielendal net bekend mei binne. Lit dy betsjoene foar dyn lespraktyk mei in fluwielsêft of rûchrau rantsje.
Hoe krijst learlingen de drompel oer om Frysk te praten? Dûk yn de rol fan Meester Jaap, Peter Pan of Alice yn Wûnderlân en de magy docht syn wurk! In kursist sei: ‘Dit is echt fét leuk! Wy brûke dit op skoalle, de bern fine it machtich. Wa hâldt no net fan teater?’
Yn dizze lêste gearkomste komt alles by-inoar. De ferskillende ûnderdielen, jim nije opdiene ynsjoch, kennis, jim ambysjes. Do setst se hjoed om yn in fisy. Wat is dyn stip op ’e hoarizon, wat hasto en dyn skoalle nedich om it Frysk it plak te jaan dat it fertsjinnet?